William Botoner to Sir John Fastolf, 1st February 1458

Type: Letter
Display:
517

To my ryght worshypful master, Sir John Fastolf.

Ryght worshypfull Sir, and my ryght gode maister, I recomaund me to yow yn my full humble wyse. Please yow to wete that I rode wyth Maister Paston to Cotton, and there he had the tenauntes before hym and toke a state and seison yn the feffé namys acordyng to the dede to your behofe. And there nedyth grete reparacion, or the jnner court and the barnys wylle falle doune. Hyt ys grete pitie of certeyn your tenauntes that lak her beestes and be destroyed thys snow seson yn Wentworth parkes. Paston wille do that he can to remedye it. And also by the astate of Cotton passed the astate of your maner in Nacton because it ys yn one dede, but yff the parson or Sprylyng may be at Nacton when they shall hold a court there or tak the accomptes the tenauntes most attorne to Ser Thomas yn your name and so be-com tenaunt.

Item, I hafe delyuered to Maister Ȝeluerton, Fylonglee, and othyrs your lettres wyth such credence as ye and Paston hafe avysed me, and shall entend here yn such besynesse as Paston avysyth me for your proffyt. And Matheu taryeth here tille som othyr lettres or message be redye, because Dygon the parson chylde commyth home to yow owt of my contree and bryngyth such lettres as be redy now.

Item, Columber, le purcyuaunt of Ser William Cosynot; departyth thys next weke, and he hath wyth hym all the informacion that ys necessary for thys tyme to grounde the mater for Ser Gy your prisonnere; he seyth ryght well. And as for Hue Hunt, he ys not yhyt com yn-to Ingland. I shall inquire of Molyneux after hys commyng and speke wyth hym for to recuuere th'enderiture of Lord Cromewell executours.

Item, as to nouveltees here both Christofr Barker wryteth to you more along. The Kyng came the last weke to Westminster, and the Duk of Yorke came to London with hys oune housole onlye to the nombre of cxl. hors, as it ys seyd; the Erle of Salysburye with iiijc. hors yn hys companye, iiijxx knyghts and sqwyers. The Duke of Somerset came to London last day of Janyver with ijc. hors, and loggyth wythoute Temple Barre, and the Duc of Excestr shalle be here thys weke with a grete felyshyp and strong, as it ys seyd. The Erle of Warwyke ys not yhyt com, because the wynde ys not for hym. And the Duke of Excester takyth a grete displesir that my Lord Warewyke occupyeth hys office, and takyth the charge of the kepyng of the see uppon hym.

Item, as for tydyng of beyend see, I hyre none certeyn, but that the Frensh Kyng shulde hafe maryed hys doughter to the Kyng of Hungerye, whych had the descomfytur uppon the Turks, and the seyd Kyng ys decesed wythynne thys vj. wekes, or the spouselle was made; but he ordeyned or he dyed that the Frensh Kyngs doughter shuld be named Quene of Hungerye duryng hyr lyffe.

Rygt worshypfull Sir, I beseche the blessed Trinite hafe yow yn hys gouvernaunce.

Wrete at London, the fyrst day of Feverzer, anno 36 R. H. VI.

* * *
Moreover, please you to wete that William Canyngs the merchaunt wryteth an aunsuer of your lettre. I trust it shall be the better for your wrytyng.

My brother promytted me a certeyn somme when I maryed, and I shall hafe it of my sister yff I may.

Your humble servauntte,

W. BOTONER, _dit_ WORCESTYR.

Back to previous page